تعرفى على اهم النصائح التى تساعدك فى تربية ابنائك | فور ليدي

ايه هى النصائح المهم ليكى كأم وانت ليك كأب والتى تساعدك فى تربية ابنائك بشكل صحيح في مجتمع كثر فيه الخطأ واصبحت الاخطاء شئ عادى ومستباح , تابعى نصائح مهمه فى تربية ابنائك

ولادي بيضيعوا مني . حاسه ان عمري كله راح هدر بعد ماربيت وعلمت وزرعت كله راح عالارض. • مش عارفه اعمل ايه ؟  •هو العيب فيا ولا فيهم ؟  •هوالعيب في تربيتي ليهم ولا في المجتمع اللي حوالينا ؟  نركز بقى شويه ونستهدى بالله كده ؛ •خلينا نتفق ان اي مشكله ليها سبب ولو حطينا ايدينا علي السبب هنعرف نحلها ، وفور ليدي عودتك تكون معاكى فى كل موقف يحصل لك علشان تكون زوجه وربه منزل وام مثاليه ، تابعى معنا مقاله نصائح مهمة تساعدك فى تربية ابنائك

تربية ابنائك

نبدأ بالمشكلة

ابني (او بنتي ) مصاحب – بيشرب سجاير ، مخدرات ، شيشه ، ڤيب – بيعند – بيتعصب – بيعلي صوته عليا – بيكذب – بيسرق – بيتبلطج – بيسمع كلامي كله وبينفذه بالحرف الواحد من غير نقاش – مش بيسيب الموبايل – بيتفرج علي مواقع اباحيه – مش عايزه تتحجب – عايزه تقلع الحجاب . كفايه ولا أقول كمان ؟  مش بيسمع كلامي – مابئاش بيصلي ولا بيحفظ قرآن  – بيمارس جنس او العاده السريه – بيكره أخواته – بيقول الفاظ وحشه – بئى شاذ – بيهرب من البيت – بيعمل cutting يعني بيقطع جسمه – بائس – حزين – معتزلنا ومش بينطق.  كفايه كده عليكم ؟ ….كفايه .

ندخل بقى ع السبب

لو ابنك او بنتك عندهم مشكلة من المشاكل اللي قولناها دي يبئي اكيد اتعرضوا لسبب من الأسباب اللي هنقولها دي .   

• •إهانه – ضرب – دلع زياده (حبيب قلب ماما) – رقابه زياده وخانقه وتتبع في كل صغيره وكبيره  – مفيش رقابه خالص ( عايشه مع نفسك في اللالا لاند) – تأنيب – مقارنه – إهمااااال – سخريه – تحرش – رفض – أصدقاء السوء – قسوه – قهر – تقليل من شأنه – عدم تقدير – تشدد في الدين او مفيش دين أصلا – منع – حرمان مادي اومعنوي – إهماااااال تاني – صراعات مابين الأب والأم ونحط تحت دي  ١٠٠ خط .  

طيب بردو يعني ايه اللي حصل بالظبط ؟ تربية أبنائك

• أقول لحضرتك ايه اللي حصل بالظبط .
• اللي حصل ان كل اللي وصل للابن او البنت من التصرفات دي انك بتكرهه مع انك ممكن تكون بتعمل كده من منطلق الحب .
• فحس بالغضب والوحده والخزي والخوف وعدم الأمان.
• حس انه عايز يهرب بأي طريقه من الواقع الاليم اللي هو عايشه فقرر يعمل اي حاجه واهو بالمره يضايقك زي ما انت ضايقته .  
• حس انه مش عايز يكمل في الظلم البين اللي بيتظلمه كل يوم ويروح يترمي في حضن حد يحتويه حتي لو صديق سوء .
• حس بصراع نفسي رهيب بيحصل جواه ومش عارف يعبر عنه عشان عيب يتكلم ولو اتكلم هيدفع تمن كل كلمه قالها .
• حس انه مش عارف يرضيك بمبادئك اللي بتغرسها بكل قسوه تحت مسمي ( التربيه ) ولا يرضي المجتمع اللي حواليه اللي كل حاجه فيه متاحه وسهله .  كفايه كده ؟ …. كفايه .

نصائح مهمه مفيدة فى تربية ابنائك

• اول حاجه هنعملها قبل مانتصرف اي تصرف هنحط نفسنا مكان اولادنا ونشوف لو احنا غلطنا هنحب اللي حوالينا يعملوا معانا ايه ؟ ويتصرفوا معانا ازاي ؟  ونتصرف … 
• أرجوكم بلاش رد الفعل ساعة اكتشاف المشكله يكون عنف من اي نوع استهدوا بالله كده واستغفروا وقوموا اتوضوا وصلوا ركعتين وبعدين ارجعوا اتناقشوا بالمنطق .
• احنا بشر والخطأ وارد . هما لسه بيتربوا ولو ماغلطوش مش هيتعلموا يعني ناخد الغلط فرصه
• ابنوا ثقه مابينكم من اول وجديد
• عاملوهم بإحتواء وصاحبوهم بطريقتهم اكنهم بيكلموا حد من أصحابهم بجد
• اتكلموا معاهم كتيييييييييير. 
• طلب صعب شويه ( سيبوا الموبايل وهما قاعدين معاكم )
• وَفّرولهم صحبه صالحه تكونوا عارفين اهلهم وتربيتهم واعزموهم في بيتكم وكبروا ولادكم قدام أصحابهم 
•  واستودعوهم ربنا دايما وهما خارجين لوحدهم الواحد مش عارف اولاده حيواجهوا ايه
• شبعوهم كلام حلو وحنان  واحضان وهدايا
• هزروا واضحكوا والعبوا معاهم عادي زي ولادكم
• قدروهم واثنوا علي تصرفاتهم الحلوه وركزوا علي مميزاتهم 
• حبوهم زي ماهما واقبلوهم .حبوهم بدون قيود ولا مبادئ
• ازرعوا فيهم حب ربنا قبل ماتخوفوهم منه . بَشّروا ولا تُنَفرّوا.
• إملوا وقت فراغهم برياضه او حاجات مفيده تشغل دماغهم
• خليكم دايما ليهم ضهر وسند لما يقعوا في مشكله ييجوا جري عليكم عشان تساعدوهم
• ياتبطلوا خناق علي كل صغيره وكبيره ( الأب والأم) ياترحموهم نفسيا وتسيبوا بعض
• حسسوهم بالأمان واتكلموا معاهم كتييييييييييير
• بلاش قسوه ولأ علي كل حاجه من غير تفكير
• علموهم يعبروا عن مشاعرهم زي ماهي
• سيبولهم حرية اتخاذ القرار حتي لو غلط عشان يقدروا يحكموا عالصح والغلط ويفرقوا مابينهم
• احترموا احتياجاتهم وخصوصياتهم واوعوا تذموا فيهم قدام حد
• ربّوهم بالقدوه والحب مش بالقوه والاوامر
• ادعولهم ربنا يهديهم ويحفظهم .
• كده احنا عرفنا نحدد المشكله بشكل عام والاسباب وان شاء الله نقدر نطبق الحل
• وأخيرا … الحياه مش مستاهله ندمر أعز مانملك .  رفقا ً بأنفسنا وبأولادنا .    {وَلْيَخْشَ الَّذِينَ لَوْ تَرَكُواْ مِنْ خَلْفِهِمْ ذُرِّيَّةً ضِعَافًا خَافُواْ عَلَيْهِمْ فَلْيَتَّقُواّ اللَّهَ وَلْيَقُولُواْ قَوْلًا سَدِيدًا )
• وبكدا نكون عرفنا بعض النصائح المهمه والتى تفيدك فى تربية ابنائك فتعلم تربية ابنائك صح